၃၈ဖြာမင်္ဂလာ(၂၃)

( ၂၃ ) မိမိကိုယ်ကို နှိမ့်ချခြင်း

မိမိကိုယ်ကို နှိမ့်ချခြင်းသည် မင်္ဂလာတစ်ပါး ဖြစ်သည်။

တစ်နည်းအားဖြင့် ကြီးပွားချမ်းသာခြင်း၏ အကြောင်းတစ်ရပ် ဖြစ်သည်။ အောက်ပါဇာတ်တော်ကို သာဓကအဖြစ် တင်ပြပါသည်။

တစ်ရံရောအခါ ဘောဂပြည်ဝယ် ဉာဏရာဇာမင်းကြီး မင်းပြုသည်။ ထိုမင်းသည် ဉာဏ်ပညာနှင့် ပြည့်စုံသည်။ ပညာရှိ မှူးမတ်များလည်း ပေါများသည်။

မင်းကြီးတွင် ဗလနှင့် သောမ အမည်ရှိသော သားတော်နှစ်ပါး ရှိသည်။ သားတော်ကြီး ဗလသည် စိတ်ထားမကောင်း၊ မာန်မာနကြီး၏။

သားတော်ငယ် သောမကား ထိုသို့မဟုတ်။ စိတ်ထားကောင်း၏။ မာန်မာန လုံးဝမရှိ။ နိဝါတတရားကို လက်ကိုင်ထားလျက် နှိမ့်ချစွာဖြင့် မှူးမတ်ပြည်သူတို့ကို ဆက်ဆံ၏။

တစ်နေ့သောအခါ ဗလသည် သားနားစွာ ၀တ်ဆင်၍ မြင်းစီးလျက် မင်းပွဲသဘင်သို့ တက်ရောက်ရန် ထွက်လာသည်။ လမ်း၌ သူ့ရှေ့မှ သွားနေသော ဆင်းရဲသား အဘိုးအိုတစ်ဦးကို မြင်တွေ့သည်။ အဘိုးအိုသည် ခရီးသည်တစ်ဦး ဖြစ်သည်။ လွယ်အိတ်ကိုလွယ်လျက် အဝေးမြို့ရွာသို့ သွားနေသည်။ ဗလ မြင်းစီးလာသည်ကို မသိရှာ။ ထို့ကြောင့် လမ်းဖယ်မပေးမိ။ ထိုအခါ ဗလက ဆဲရေးပြီးလျှင် မြင်းနှင့်တိုက်သွားသည်။ အဘိုးအိုခမျာ လမ်းဘေးသို့ လဲကျသွားရှာလေသည်။

သောမသည် နောင်တော်ဗလနောက်မှ မြင်းစီးလျက် လိုက်လာရာ ဖြစ်ပုံအလုံးစုံကို မြင်လိုက်သည်။ သူသည် ချက်ချင်းပင် မြင်းပေါ်မှ ခုန်ဆင်းလိုက်သည်။ အဘိုးအိုကို ယုယစွာ ထူမပေးသည်။ မေးမြန်းကြည့်ရာ အဘိုးအို ခြေထောက်အနည်းငယ် နာသွားသည်ကို သိရသည်။

သို့ဖြင့် သူ၏ မြင်းကိုစီးရန် ပြောဆိုသည်။ မြင်းကို အဘိုးအိုအား အပိုင်ပေးအပ်သည်။ ထိုအခါ အဘိုးအိုသည် ကျေးဇူးတင်လှသဖြင့် လွယ်အိတ်ထဲမှ ပါလာသော ပေစာထုပ်ကို သောမအား ပေးအပ်သည်။

အရှင့်သား၊ ကျေးဇူးကြီးလှပါသည်။ ကျေးဇူးဆပ်သော အနေဖြင့် အဘိုးက ဤပေစာထုပ်ကို လက်ဆောင်ပေးပါသည်။ ဤပေစာမှာ-သုတကျမ်းရတနာ-ဖြစ်သည်။ အရှင့်သား အစဆုံးဖတ်၍ လေ့လာပါ။ ဉာဏ်ပညာ၊ ဗဟုသုတ အထူးတိုးပွားလာပါလိမ့်မည်-ဟူ၍ ဆို၏။

သောမသည် ၀မ်းမြောက်ဝမ်းသာပင် ပေစာထုပ်ကို လက်ခံယူသည်။ အဘိုးလည်း မြင်းစီး၍ ထွက်ခွာသွားသည်။ သောမသည် နှိမ့်ချစွာပင် ခြေကျင်လျှောက်၍ မင်းပွဲသဘင်သို့ ဆက်လက်ထွက်ခွာလာသည်။

ဤသို့ဖြစ်ပျက်ပြီး ၆-လခန့်ကြာသော် အိမ်နီးချင်း တိုင်းပြည်တစ်ပြည်မှ သံအဖွဲ့တစ်ဖွဲ့သည် ဘောဂပြည်သို့ ရောက်လာသည်။ သူတို့သည် မင်းကြီးကို ဖူးတွေ့လျက်-အရှင်မင်းမြတ်သည် ဉာဏ်ပညာကြီးမား၍ အရှင်မင်းမြတ်ထံတွင် ပညာရှိမှူးမတ် ပေါများသည်ဟူ၍ ကြားသိရပါသည်။ ထို့ကြောင့် ကျွန်တော်မျိုးတို့၏ ဘုရင်မင်းမြတ်နှင့် ပညာရှိမှူးမတ်များ တိုင်ပင်ကာ အရှင်တို့ကို ဉာဏ်ရည်စမ်းသောအနေဖြင့် မေးခွန်းသုံးသွယ်မေးရန် လာရောက်ခြင်းဖြစ်ပါသည်။ ဖြေကြားတော်မူပါ-ဟူ၍ လျှောက်ထားသည်။ ရွှေပေပေါ်တွင် ရေးထိုးထားသော မေးခွန်းသုံးသွယ်ကို ဆက်သသည်။

ယင်းတို့မှာ-

(၁) အရိုးသာ အတောင်အမြီးဖြစ်သော ငှက်သည် အဘယ်ငှက်နည်း။

(၂) အသားသာ အတောင်အမြီးဖြစ်သော ငှက်သည် အဘယ်ငှက်နည်း။

(၃) အမွေးသာ အတောင်အမြီးဖြစ်သော ငှက်သည် အဘယ်ငှက်နည်း။

ဤမေးခွန်းသုံးသွယ်ကို မင်းကြီးနှင့်တကွ ပညာရှိအမတ်များသည် ဖြေဆိုနိုင်ရန် အမျိုးမျိုးကြံဆကြသည်။ အဖြေမပေါ်။ သို့ဖြင့် ၃-ရက်မြောက်သောနေ့တွင် ဖြေဆိုမည်ဟူ၍ ချိန်းလိုက်သည်။

မင်းကြီးနှင့် မှူးမတ်တို့လည်း အခက်တွေ့ကြပြီ။ မေးခွန်းသုံးသွယ်ကို ဖြေလည်းမဖြေနိုင်။

သည်တွင် သားတော်ကြီး ဗလ-က ခက်ခဲသောမေးခွန်းကို လာမေးရပါမည်လော-ဟုဆိုကာ သံအဖွဲ့ဝင်များကို သွားရောက်ဖမ်းဆီး၍ သတ်မည်ပြုသည်။ မင်းကြီးက အမျိုးမျိုး တားဆီးသည်။ နောက်ဆုံး တားမရသဖြင့် ဗလကို တိုင်းပြည်မှ နှင်ထုတ်လိုက်ရလေသည်။

ထိုစဉ် သားတော်ငယ် သောမသည် ခမည်းတော်ထံ ချဉ်းကပ်လျက် မေးခွန်းသုံးသွယ်ကို မိမိဖြေဆိုနိုင်ကြောင်း၊ သူဆင်းရဲအဘိုးအို ပေးသော သုတကျမ်းရတနာကို မိမိလေ့လာထားသဖြင့် ဤမေးခွန်းသုံးသွယ်ကို ကောင်းစွာ ဖြေဆိုနိုင်ကြောင်း တင်လျှောက်သည်။

သို့ဖြင့် ချိန်းဆိုသောနေ့သို့ ရောက်လာသည်။ ညီလာခံခန်းမဆောင်တွင် အမေးပုစ္ဆာဖြေဆိုပွဲကို ကျင်းပသည်။ မှူးမတ်ဗိုလ်ပါ စုံညီတက်ရောက်ကြသည်။ သံအဖွဲ့ဝင်အားလုံးလည်း တက်ရောက်သည်။

သားတော် သောမသည် ပရိသတ်ဗိုလ်ပုံအလယ်တွင် ရဲရင့်စွာ ထိုင်လျက် မေးခွန်းသုံးသွယ်ကို အောက်ပါအတိုင်း ရှင်းလင်းပြတ်သားစွာ ဖြေဆိုသည်။

(၁) အရိုးသာ အတောင်အမြီးဖြစ်သော ငှက်မှာ-ပိတုန်း ဖြစ်ပါသည်။

(၂) အသားသာ အတောင်အမြီးဖြစ်သော ငှက်မှာ-ရှူးပျံ ဖြစ်ပါသည်။

(၃) အမွေးသာ အတောင်အမြီးဖြစ်သော ငှက်မှာ-ဥဒေါင်း ဖြစ်ပါသည်။

ဤသို့ဖြေဆိုလိုက်သောအခါ သံအဖွဲ့ဝင်များက ဟုတ်ပါပေသည်-ဟု ဆိုကာ သောမကို ချီးကျူးကြသည်။ ဆုလာဘ်များ ပေးအပ်ကြသည်။ မင်းကြီးနှင့် တကွ မှူးမတ်ပြည်သူအားလုံးလည်း ၀မ်းမြောက်ဂုဏ်ယူမဆုံး ရှိကြသည်။ ထိုနေ့မှာပင် မင်းကြီးသည် မှူးမတ်များနှင့် တိုင်ပင်ကာ သားတော်ငယ် သောမကို အိမ်ရှေ့အရာ နှင်းအပ်ချီးမြှင့်လိုက်လေသည်။

ကျမ်းကိုး။ ။

(၁) မင်္ဂလာသာရ ဒီပနီကျမ်း။

(၂) မြန်မာဂုဏ်ရည် (ဦးဖိုးကျား)

မင်းယုဝေ

( မြတ်မင်္ဂလာ ၂၀၀၃-ခု ဇွန်လ)