Friday 28 September 2012

၃၈ဖြာမင်္ဂလာ(၁၉)

( ၁၉ ) မကောင်းမှုကို စိတ်ဖြင့် ရှောင်ကြဉ်ခြင်း
မကောင်းမှုကို စိတ်ဖြင့် ရှောင်ကြဉ်ခြင်းသည် မင်္ဂလာတစ်ပါး ဖြစ်သည်။
တစ်နည်းအားဖြင့် ကြီးပွားချမ်းသာခြင်း၏ အကြောင်းတစ်ရပ် ဖြစ်သည်။

ရှေးသရောအခါ ဗာရာဏသီပြည်ဝယ် ဒိသာပါမောက္ခ ဆရာကြီးတစ်ဦး ရှိသည်။ သူသည် ပညာလည်းရှိသည်။ အကျင့်သီလလည်း ကောင်းသည်။ သူ့ထံသို့ အမျိုးကောင်းသား လုလင်များစွာတို့သည် လာရောက် အတတ်သင်ကြသည်။ ဆရာကြီးတွင် လှပယဉ်ကျေးသော သမီးပျိုကလေးတစ်ဦး ရှိသည်။ တစ်နေ့တွင် ဆရာကြီးက-တပည့် လုလင်တို့ကို ကိုယ်ကျင့်တရား ကောင်း-မကောင်း ငါစူးစမ်းမည်။ သူတို့အထဲမှ ကိုယ်ကျင့်တရား ကောင်းသူကို ငါ့သမီးနှင့် လက်ဆက်ပေးမည်-ဟူ၍ ကြံစည်သည်။
ထို့နောက် သူသည် တပည့်လုလင်တို့ကို ခေါ်သည်။ အမောင်တို့-ငါ့ သမီးသည် အရွယ်ရောက်ပြီ။ ငါ့သမီး ဆင်မြန်းရန် သင်တို့အိမ်မှ အ၀တ်တန်ဆာတို့ကို မိဘဆွေမျိုးတို့ မသိအောင် တိတ်တဆိတ် ခိုးယူလာခဲ့ပါ။ အဖိုးအထိုက်ဆုံးသော အ၀တ်တန်ဆာကို ခိုးယူလာနိုင်သူအား ငါ့သမီးနှင့် ထိမ်းမြားပေးမည်-ဟူ၍ ပြောဆိုသည်။

တပည့်တို့သည် ဆရာကြီး၏ သမီးကို စုံမက်ကြသည်။ ထို့ကြောင့် ဆရာကြီး စေခိုင်းသည့်အတိုင်း အိမ်သို့ပြန်၍ အဖိုးတန် အ၀တ်တန်ဆာများကို မိဘဆွေမျိုးတို့ မသိအောင် ခိုးယူလာကြသည်။ ဆရာကြီးကို ပေးအပ်ကြသည်။ ဆရာကြီးကလည်း ပစ္စည်းအားလုံးကို အမှတ်အသားပြု၍ စနစ်တကျ သိမ်းဆည်းထားသည်။

ဤသို့ တပည့်လုလင်တို့သည် အိမ်မှ အ၀တ်တန်ဆာတို့ကို ခိုးယူလာသော်လည်း ထူးခြားသော တပည့်လုလင် တစ်ဦးမူ လုံးဝ ခိုးယူခြင်း မပြုပေ။ တစုံတစ်ခုသော အ၀တ်တန်ဆာကိုမှ ဆရာကြီးထံ ပေးအပ်ခြင်း မပြုပေ။

ထိုအခါ ဆရာကြီးက ထိုလုလင်အား အကြောင်းရင်းကို စုံစမ်းမေးမြန်းသည်။ လုလင်က-ဆရာ အကျွန်ုပ်သည် ဆရာကြီးသမီးပျိုကို စုံမက်ပါသည်။ သို့ရာတွင် အိမ်မှအ၀တ်တန်ဆာကိုမူ ခိုးယူခြင်းမပြုလိုပါ။ လောက၌ မကောင်းမှုပြုသူအဖို့ ဆိတ်ကွယ်ရာ အရပ်မည်သည် မရှိပါ။ ခိုးယူမှုစသော မကောင်းမှုကို အကျွန်ုပ်သည် စိတ်ဖြင့်ပင် မပြစ်မှားလိုပါ-ဟူ၍ ပြောဆိုသည်။

ဆရာကြီးသည် ထိုလုလင်ကို အလွန်နှစ်သက် မြတ်နိုးသွားသည်။ အမောင်-ငါ့သမီး၌ အ၀တ်တန်ဆာမရှိ၍ ခိုးခိုင်းသည် မဟုတ်ပါ။ ကိုယ်ကျင့်တရား ကောင်းသူကို စမ်းသပ်ရွေးချယ်ခြင်းသာ ဖြစ်သည်။ အမောင်သည် ငါ့သမီးနှင့် ထိုက်တန်သူ ဖြစ်သည်-ဟု ပြောဆိုသည်။ ထိုလုလင်ပျိုကို ချီးကျူးကာ သမီးနှင့် ထိမ်းမြားပေး လေသည်။

ကျန်တပည့်တို့အား မကောင်းမှု မပြုရန် ဆိုဆုံးမသည်။ ခိုးယူလာခဲ့သော ပစ္စည်းများကိုလည်း အသီးသီး ပြန်လည်ပေးစေလေသည်။
( ကျမ်းကိုး-၅၅၀-သီလ၀ီမံသနဇာတ်)

( မင်းယုဝေ)
( မြတ်မင်္ဂလာ ၂၀၀၃-ခု ဖေဖော်ဝါရီလ)

No comments:

Post a Comment